الرئيسية / منوعاتية / ضحكة  السبع

ضحكة  السبع

سعيد مهمة

إلى ضْحك السبع، نْوَصِّيك لا تْقَرَّب لِيه

راه بعد الضحكة، يريد يسلم عليك

بظفارو لابد يخمش، و يقربك ليه

و إلى عطيتيه الراس، سلَّم فالسْقِيطة يا ولد الناس

راه يطعمك، يطعمك، و بعد ما تَسْمَان

يْكَسَّر العظم، ياكل اللحم و يزيد المصران

إلى عْيَا السبع، يْرَكْبُ عليه القرودة

شي يعلف، و شي ينتف

 و شي يبغي على خُوه يَهْرَفْ

 و شي يْحَرَّك السْنَان بحال إلى كيحلف

 اللهم مَاكْلَتْ السبع و لا لعب القرودة

***************

 سَعْدَات لي يْقَيَّسْ قبل ما يْغَيَسْ

 أما الْمَرْمَادة دارُو من الرَّفْسة عجينة

 ما هي خبزة ، ما هي  حريرة

 سَفْهُو الأعلام، وْ دارُو الدّرْبُوز لَغْشَام

 و بْنَاوْ لِيهم الَمْقَام

وَبدَاوْ فالتَّحْيَاح،هَذِي جات، و هذي ما جات

 لي يَتْسَنَى الخير من الخنزير

 راه يحفر و يخسر

ما يصلاح مَاهْ المنقوس للصحبة و العشرة

ما يصلاح للعادة و لا للعبادة

****************

 أطلب الفكاك بسبع ريالات

 بيع، و خروج من السوق

 لا تتسنى البرَّاح يدير بُوق

 ما بْقى مْعَ مَنْ يا ولد الناس

 مْشَاوْ الرَّكَابة

 كانوا حْمِيَة ويَعْطِيوْ الدِّيَة

 أُودَابا ؟

 ما كاين غير راسي، يا راسي

 ضْرب دَوْرة، ورُدْ بالك من الْغُولة

 كانت تخلع فذاك الزمان الصبيان

 أو دابا ؟

 الله يا بابا، علاش توسولني

 الرجال و النسا منها ندابا

 الله، الله

 الله يفك يا مسكين

عن Scoopress

تحقق أيضا

المفكر محمد سبيلا يُوارى الثرى.. بعد صراع مع المرض

  المرحوم المفكر محمد سبيلا   الحسين البوكيلي وُورِيَ الثرى ،بعد صلاة عصر أمس الإثنين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *